అమ్మేది కూరగాయలే కానీ.. అసలు యవ్వారం వేరే ఉంది.. వీడి అసలు బాగోతం తెలిస్తే షాక్ అవుతారు..!
అతనొక పెయింటర్.. గోడలకు రంగులేసుకుంటూ జీవనం కొనసాగిస్తుంటాడు. ఖాళీ సమయాల్లో బండిపై కూరగాయలు అమ్ముతుంటాడు. పాపం.. కుటుంబాన్ని పోషించేందుకు ఎంత కష్టపడుతున్నాడో అని జాలి చూపిస్తే మాత్రం పప్పులో కాలేసినట్టే. అమ్మేది కూరగాయలే అయినా.. అసలు యవ్వారం వేరే ఉంది. అతని అసలు బాగోతం తెలిస్తే.. షాక్ అవటం గ్యారెంటీ. హైదరాబాద్ నగరంలో చాలా రోజులుగా పోలీసులకు దొరకకుండా తప్పించుకు తిరుగుతున్న మోస్ట్ వాంటెడ్ దొంగ చిక్కాడు. 10కి పైగా దొంగతనం కేసుల్లో నిందితునిగా ఉన్న వ్యక్తిని హైదరాబాద్ బండ్లగూడ పోలీసులు అరెస్ట్ చేశారు. అయితే.. ఈ గజదొంద అసలు బాగోతం ఏంటంటే..!
బండ్లగూడలోని ఇస్మాయిల్‌నగర్‌లో నివాసం ఉంటున్న మహ్మద్‌ సలీమ్ అలియాస్‌ సునీల్‌ శెట్టి వాల్‌ పెయింటర్‌గా పనిచేస్తున్నాడు. అయితే అప్పుడప్పుడు తోపుడు బండిపై కూరగాయలు అమ్ముతుంటాడు. అయితే.. ఇదేదో పొట్టకూటి కోసం కాదండి.. తాళం వేసిన ఇళ్లను గుర్తించేందుకు. కూరగాయలు అమ్ముతున్నట్టు కలరింగ్ ఇస్తూ.. తాళం వేసి ఉన్న ఇళ్లను రెక్కీ చేస్తాడు. అదే రాత్రి యాక్షన్‌లోకి దిగి.. తాను ఎంచుకున్న ఇంటి తాళాలు పగలగొట్టుకుని.. రాత్రికి రాత్రే పూర్తిగా దోచేస్తాడు. బంగారం, నగదుతో పాటు ఇంట్లో ఉన్న విలువైన వస్తువులన్నింటినీ సర్దేస్తాడు.
కాగా.. సలీమ్ మీద హైదరాబాద్ పరిధిలో సుమారు 10కి పైగా దొంగతనం కేసులు నమోదైనట్టు పోలీసులు తెలిపారు. అయితే.. ఈ ప్రబుద్దుడిపై కేవలం 10కి పైగా దొంగతనం కేసుల్లో మాత్రమే నిందితుడు కాదు.. గతంలో పెద్ద క్రైం హిస్టరీనే ఉందని టాస్క్ ఫోర్స్ అదనపు డీసీపీ శ్రీనివాసరావు తెలిపారు. నిందితుడు సలీమ్ గతంలో.. 150 కేసుల్లో చిక్కుకుని జైలుకు కూడా వెళ్లినట్లు వివరించారు. వివిధ కేసుల్లో నిందితుడిగా ఉన్న సలీమ్.. జైలు శిక్ష అనుభవించగా.. 2023లో బెయిల్‌పై విడుదలైనట్టు పోలీసులు తెలిపారు. అలవాటు పడిన ప్రాణం ఊరుకుంటుందా.. జైలు నుంచి వచ్చిన తర్వాత కూడా మళ్లీ తన యాపారాన్ని సాగిస్తున్నాడు. తాజాగా ఓ చోరీ కేసులో పోలీసులకు అడ్డంగా దొరికిపోయిన సలీమ్‌ను పోలీసులు అదుపులోకి తీసుకున్నారు. నిందితుని నుంచి 22 లక్షల విలువైన 29 తులాల బంగారం, కిలో వెండిని పోలీసులు స్వాధీనం చేసుకున్నారు.
ఇటువంటి మరిన్ని వార్తలు సమయం తెలుగులో చదవండి. లేటెస్ట్ వార్తలు, సిటీ వార్తలు, జాతీయ వార్తలు, బిజినెస్ వార్తలు, క్రీడా వార్తలు, రాశిఫలాలు ఇంకా లైఫ్‌స్టైల్ అప్‌డేట్లు మొదలగునవి తెలుసుకోండి. వీడియోలను TimesXP లో చూడండి. 2024-07-04T13:56:35Z dg43tfdfdgfd